Рубрики
Асосӣ

МАСТЧОҲ: ИДОМАИ МАҶЛИСИ ҲИСОБОТӢ–ИНТИХОБОТӢ ДАР ТАШКИЛОТИ ИБТИДОИИ “КИШОВАРЗ”

Маҷлиси ҳисоботӣ-интихоботии ташкилоти ибтидоии “Кишоварз” бо иштироки Зуфар Исмоилзода – раиси КИ ҲХДТ дар вилояти Суғд ва дигар аъзои гурӯҳ бо омӯзгорони МДТ “Коллеҷи кишоварзӣ”-и ноҳия баргузор шуд.

Маҳмадғаюр Сабуров – директори МДТ “Коллеҷи кишоварзӣ”-и ноҳияи Мастчоҳ маҷлисро ифтитоҳ намуда, мақсаду муҳтавои онро шарҳ дода, рӯзномаи маҷлисро ироа кард:

Муҳтарам ҳозирин! Моро зарур аст, ки рӯзномаи кори Маҷлисро тасдиқ намоем. Ба маҷлиси имрӯза баррассии масъалаҳои зерин пешниҳод мешавад:

Ҳисоботи раиси ташкилоти ибтидоии “Кишоварз” дар дар давраи ҳисоботӣ;

Интихоби раиси ташкилоти ибтидоии “Кишоварз”, – гуфт М. Сабуров.

Доир ба масъалаи якуми маҷлис раиси ташкилоти ибтидоии “Кишоварз” ҳисоботи худро қироат намуд.

Дар қисмати музокираи маҷлис Довуд Ниёзов – муовини директори МДТ “Коллеҷи кишоварзӣ”-и ноҳияи Мастчоҳ оиди корҳои хоҷагӣ баромад намуда, фаъолияти кории ташкилоти ибтидоии “Кишоварз”-ро дар давраи ҳисоботӣ қонеъкунанда арзёбӣ кард.

Сипас, Маҳмадғаюр Сабуров Қарори маҷлисро қироат намуд:

Маҷлиси умумии ташкилоти ибтидоии “Маърифат” қарор мекунад:

Ҳисоботи раиси ТИ ҲХДТ “Маърифат” дар давраи ҳисоботӣ қаноатбахш ҳисобида шавад.

Раиси ташкилоти ибтидоии “Кишоварз” вазифадор карда шавад, ки барои риояи дақиқи Оинномаи ҲХДТ, Одобномаи корманди ҳизбӣ, татбиқи амалии Барномаи ҳизб ва ҷалби аъзои арзанда ба сафи ҲХДТ чораҳои муассирро роҳандозӣ намояд.

Назорати иҷрои қарори мазкур ба зимаи раиси ташкилоти ибтидоӣ гузошта шавад.

Тибқи масъалаи дуюми рӯзномаи маҷлис номзадии директори МДТ “Коллеҷи кишоварзӣ”-и ноҳияи Мастчоҳ – Маҳмадғаюр Сабуров пешниҳод гардида, вобаста ба шахси арзанда будани ӯ Вафо Усмонов – омӯзгори МДТ “Коллеҷи кишоварзӣ”-и ноҳия дар қисмати таклифот суханронӣ карда, номзадии шахси арзандаро дастгирӣ кард.

Раиси нави ташкилоти ибтидоии “Кишоварз” – Маҳмадғаюр Сабуров барои ба боварии узви гурӯҳи кории маҷлиси мазкур интихоб гардидани вай изҳори сипосу миннатдорӣ намуд.

Дар охир, раиси КИ ҲХДТ дар вилояти Суғд – Зуфар Исмоилзода саҳми арзандаи омӯзгорон дар самти рушди давлату давлатдории навини тоҷикон ва тарғибгарони сиёсати хирадмандонаи Асосгузори сулҳу ваҳдати миллӣ – Пешвои миллат Президенти мамлакат, муҳтарам Эмомалӣ Раҳмон зери парчами созандаю пешбарандаи ҲХДТ суханронии пурмуҳтаво намуд.

Рубрики
Асосӣ

МАСТЧОҲ: МАҶЛИСИ ҲИСОБОТӢ–ИНТИХОБОТӢ ДАР ТАШКИЛОТИ ИБТИДОИИ “ШИФО”

Дар идомаи сафари кории худ, раиси КИ ҲХДТ дар вилояти Суғд – Зуфар Исмоилзода Муртазохон ба Беморхонаи марказии ноҳияи Мастчоҳ ташриф оварда, дар маҷлиси ҳисоботӣ-интихоботии ташкилоти ибтидоии “Шифо” бо ҳамроҳии раиси КИ ҲХДТ дар ноҳияи Мастчоҳ – Дилшод Зокиров, сардухтури Беморхонаи марказии ноҳия – Музаффархон Баҳодуров ва мудирони шуъбаву духтурони собиқадори беморхонаи мазкур ширкат варзиданд.

Усмонбек Ҷумаев – раиси ташкилоти ибтидоии “Шифо” маҷлисро ифтитоҳ намуда, меҳмононро муаррифӣ ва мақсади маҷлисро шарҳ дод.

Дар ташкилоти ибтидоии “Шифо”, ки дар он ду масъала, ҳисоботи раиси ташкилоти ибтидоии “Шифо” ва интихоби раиси ташкилоти ибтидоӣ буд, баррасӣ гардиданд.

Мувофиқи рӯзномаи якуми маҷлис, раиси ташкилоти ибтидоии “Шифо” – Усмонбек Ҷумаев ҳисобот дода, дар давраи ҳисоботӣ доир ба хусуси риояи гигиенӣ-санитарии аҳолӣ, саривақт расидагии духтурони соҳибтаҷриба ба беморон, дар сатҳи баланд хизматрасонӣ намудани табибон ба муроҷиаткунандагон ва саҳми кормандони БМН дар ободонии атрофи беморхона ва тарғибу ташвиқи кормандони соҳаи тиб дар якҷоягии КИ ҲХДТ дар ноҳияи Мастчоҳ суҳбати пурмуҳтаво намуд:

– Беморхонаи марказии ноҳияи Мастчоҳ, ки бо шароитҳои замони муосир ва дастгоҳҳои нави замонавӣ муҷаҳҳаз аст, бо духтурону ҳамширагони соҳибтаҷриба таъмин буда, ҳамарӯза ба муроҷиаткунандагон дар сатҳи баланд хизматрасонӣ мекунанд. онҳо баҳри солимгардонии сокинони ноҳияи Мастчоҳ дар сатҳи зарурӣ кору фаъолият намуда, дар якҷоягӣ бо КИ ҲХДТ дар ноҳияи Мастчоҳ ҳамчун узви фаъоли ҳизб баҳри баланд бардоштани Одобномаи ҳизбӣ ва ҳамчунин тарғиб намудани ин ҳизби ҳомии халқ кӯшишу заҳматҳои худро дареғ намедоранд, – гуфт У. Ҷумаев.

Дар қисмати музокира, сардухтари Беморхонаи марказии ноҳияи Мастчоҳ – Музаффархон Баҳодуров суҳбат карда. фаъолияти кории Усмонбек Ҷумаевро дар давраи ҳисоботӣ қаноатбахш ҳисобид.

Тибқи банди дуюми рӯзномаи маҷлис: интихоби раиси нави ташкилоти ибтидоии “Шифо” баргузор гардид, ки дар он гурӯҳи кории ташкилоти ҳизбии “Шифо” дар мувофиқа бо КИ ҲХДТ дар ноҳияи Мастчоҳ ба ин вазифаи пурмаҳсул номзадии сартабиби БМН – Музаффархон Баҳодуровро пешниҳод намуданд. Дар миёни иштирокчиён Убайдулло Худойбердиев сардухтурро шахси арзанда хонд. Дар интихоби раиси ташкилоти ибтидоии “Шифо” аз ҷониби аъзои фаъоли ҳизб якдилона сардухтури БМН – Музаффархон Баҳодуровро интихоб намуданд.

Сипас, раиси КИ ҲХДТ дар вилояти Суғд – Зуфар Исмоилзода доир ба солимгардонии ҷомеаи шаҳрвандӣ ва тарғибу ташвиқи ғояҳои асосии ҲХДТ, суҳбати пурмуҳтаво намуда, барои боз ҳам баланд бардоштани нуфузу эътибори ҳизб дастуру супоришҳои мушаххас дод.

Рубрики
Асосӣ

МАСТЧОҲ: ИДОМАИ МАҶЛИСҲОИ ҲИСОБОТӢ–ИНТИХОБОТӢ

Дирӯз 15 июни соли ҷорӣ бо иштироки раиси КИ ҲХДТ дар вилояти Суғд – Исмоилзода Зуфар Муртазохон дар толори шуъбаи маорифи ноҳияи Мастчоҳ маҷлиси ҳисоботӣ-интихоботии ташкилоти ибтидоии “Маърифат” баргузор гардид, ки дар он раиси КИ ҲХДТ дар ноҳияи Мастчоҳ – Дилшод Зокиров, мудири шуъбаи маорифи ноҳия – Ибодулло Оқилов, раиси ташкилоти ибтидоии “Маърифат” – Мирзодавлат Давлатов, директорону омӯзгорон ва кормандони шуъбаи маориф иштирок намуданд.

Дар маҷлиси мазкур асосан ду масъала: ҳисоботи раиси ташкилоти ибтидоии “Маърифат” ва Интихоби раиси ташкилоти ибтидоии “Маърифат” пешниҳод шуда, аз ҷониби аъзои ҳизб хуб пазируфта шуд.

Аз рӯи масъалаи якум, раиси ташкилоти ибтидоии “Маърифат” – Мирзодавлат Давлатов доир ба фаъолияти шуъбаи маорифи ноҳияи Мастчоҳ дар давраи хисоботӣ баромади пурмуҳтаво намуд. Аз ҷумла, мавсуф зикр кард, ки:

– Бо мақсади татбиқи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, ҷалб намудани духтарон ба зинаи сеюми таҳсил ва макотиби олӣ вохӯрии Вакили Маҷлиси вакилони халқи ноҳияи Мастчоҳ дар МТМУ №11 баргузор карда шуд…

Бо мақсади дастгирӣ ва ҳавасмандгардонии қишри осебпазир таъсиси озмуни ҷумҳуриявии “Мо бо шумоем” аз ҷониби Асосгузори сулҳу ваҳдати миллӣ – Пешвои миллат Президенти Ҷумҳурии Тоҷикистон Раиси муаззами ҲХДТ, муҳтарам Эмомалӣ Раҳмон тамоми кӯдакони ноҳияро, ки то ба ҳол дар ягон озмун иштирок накардаанд, хеле хушнуд кард.

Дар озмуни мазкур аксари онҳо иштирок дошта, дар номинатсияи маҳорати суханварӣ ва қироати шеър 3 нафар, дар номинатсияи маҳорати сурудхонӣ 2 нафар ва дар номинатсияи маҳорати навохтани асбобҳои мусиқии муосир ва халқӣ 2 нафар лоиқи ҷойҳои намоён шуданд.

Ғолибони ин озмуни мазкур дар даври вилоятӣ ширкат карда, бо Сипосномаҳо қадрдонӣ гардиданд.

Инчунин, озмуни ҷумҳуриявии “Нақши китоби “Тоҷикон”-и Бобоҷон Ғафуров дар шинохти асолати миллӣ”, ки аз ҷониби Пешвои миллат таъсис карда шудааст, Ташкилоти ибтидоии “Маърифат” фаъолияти худро дар ин ҷода тибқи дастуру супоришҳои КИМ ҲХДТ, КИВ ҲХДТ ва КИН ҲХДТ иҷро намуд. Дар ин озмун, ки санаи 1-уми июн баргузор гардид, 3 нафар ҷойҳои ифтихориро касб карданд, ки ғолибони озмуни мазкур ба вилоят пешниҳод шудаанд.

Шоистаи зикр аст, ки даври ноҳиявии озмуни ҷумҳуриявии “Илм фурӯғи маърифат” низ санаи 24 майи соли ҷорӣ дар МТМУ №26, МТМУ №13, МТМУ №1, МДТ “Коллеҷи кишоварзӣ”-и ноҳияи Мастчоҳ ва МДТ “Коллеҷи омӯзгорӣ”-и ноҳия баргузор гардид, ки дар ин озмун 244 нафар; аз ҷумла, 206 нафар хонандагони муассисаҳои таҳсилоти миёнаи умумӣ ва асосии ноҳия, 21 нафар донишҷӯ ва 17 нафар омӯзгор ширкат доштанд.

Дар озмуни мазкур, аз номинатсияи математика 8 нафар, аз номинатсияи физика 6 нафар, аз номинатсияи химия 9 нафар, аз номинатсияи биология 9 нафар, аз номинатсияи география 9 нафар, аз номинатсияи технологияи иттилоотӣ 4 нафар ва аз номинатсияи ихтироъкорӣ 8 нафар сазовори ҷойҳои намоён гардиданд.

Қайд кардан ба маврид аст, ки дар давраи ҳисоботӣ, олимпиадаи ҷумҳуриявии фаннӣ бо хонандагони аз синфи 5 то 11 баргузор гардид, ки онҳо фаъолона ширкат карда, 6 нафар сазовори ҷои дуюм ва 7 нафар сазовори ҷои сеюм гардиданд. Ғайр аз ин, дар олимпиадаҳои фанниву эҷодӣ дар соли таҳсили 2020-2021 хонандагони муассисаҳои ноҳия фаъолияти пурсамар доштанд, ки аз онҳо 8 нафар сазовори ҷои 2-юм ва 7 нафар сазовори ҷои 3-юм гардиданд.

Ҳамчунин, хонандагони ноҳияи Мастчоҳ дар озмунҳои байналхалқӣ низ ширкат карда, 1 нафар сазовори ҷои дуюм ва 4 нафар сазовори ҷои 3-юм шуданд, – гуфт М. Давлатов.

Бурҳон Сафаров – директори МТМУ №1 дар қисмати музокира баромад намуда, фаъолияти раиси Ташкилоти ибтидоии “Маърифат”-ро қаноатбахш хонд.

Пас аз он, Қарори маҷлиси мазкур, ки дар 3 банди иборат аст, фаъолияти ташкилоти ибтидоии мазкурро қаноатбахш ҳисобида, раиси ташкилоти ибтидоии “Маърифат” вазифадор карда шуд, ки барои риояи дақиқи Оинномаи ҲХДТ, Одобномаи корманди ҳизбӣ, татбиқи амалии Барномаи ҳизб ва ҷалби аъзои арзанда ба сафи ҲХДТ чораҳои муассирро роҳандозӣ намояд. Инчунин, назорати иҷрои қарори мазкур ба зимаи раиси ташкилоти ибтидоии “Маърифат” гузошта шуд.

Дар баррасии масъалаи дуюми рӯзномаи маҷлис, ки тибқи банди 4.4 Оинномаи ҲХДТ раиси ташкилоти ибтидоиро Маҷлиси умумӣ интихоб мекунад, гурӯҳи кории ташкилоти ҳизбии “Маърифат” дар мувофиқа бо КИ ҲХДТ дар ноҳияи Мастчоҳ ба вазифаи раиси ташкилоти ибтидоии “Маърифат” номзадии мудири шуъбаи маорифи ноҳияи Мастчоҳ, узви кумиҷроияи ноҳиявии ҲХДТ Ибодулло Оқиловро пешниҳод намуда, дар қисмати таклифот Орзугул Шарифова – директори МТМУ №1 мудири маорифи ноҳияи Мастчоҳ – Ибодулло Оқиловро шахси арзанда ва дар кору пайкори худ содиқ буданро қайд намуд. Пас аз он, бо розигии гурӯҳи кории ташкилоти ибтидоии “Маърифат” Ибодулло Оқилов ба вазифаи раиси ташкилоти ибтидоии “Маърифат” интихоб гардид.

Пас аз тасдиқи Қарори маҷлиси умумии ташкилоти ибтидоии “Маърифат” доир ба интихоби Ибодулло Оқилов ба вазифаи раиси ташкилоти ибтидоӣ, барои интихоб гардидан ба ин вазифаи ифтихорӣ ба Раиси мауззами ҲХДТ муҳтарам Эмомалӣ Раҳмон, ба раёсати КИМ ҲХДТ, раёсати КИВ ҲХДТ ва раёсати КИН ҲХДТ миннатдорӣ намуда, изҳор дошт:

– Ҳамчун узви фаъоли ҳизб кӯшиш ба харҷ медиҳам, ки ба ин боварии Шумо сазовор гардида, баҳри пешрафту ободии ноҳия ва рушди ҳамаи соҳаҳои марбут ба маорифбуда, густариши нуфузи ҲХДТ ва барои сазовор истиқбол намудани 24-солагии Ваҳдати миллӣ ва 30-солагии Истиқлолияти давлатӣ дар ҳамаи соҳаҳо фаъолона меҳнат намуда, ба натиҷаҳои назаррас ноил мегардем.

Зуфар Исмоилзода – раиси КИ ҲХДТ дар вилояти Суғд доир ба дастовардҳои маорифчиён дар даврони Истиқлолияти давлатии Тоҷикистон, ғамхории мунтазами Асосгузори сулҳу ваҳдати миллӣ – Пешвои миллат Президенти мамлакат ба ин қишри асосии кишвар, тарғибу ташвиқ ва ба камол расонидани насли ҷавон дар рӯҳияи ватанпарастию меҳанпарастӣ суханронӣ намуда, ба собиқ раиси Ташкилоти ибтидоии “Маърифат” – Давлатов Мирзодавлат барои фаъолияти пурсамар дар самти тарғибу ташвиқи ғояҳои созандаи Оинномаву Барномаи ҳизб тӯли зиёда аз 20 сол ибрози сипосу миннтадорӣ намуда, ба мавсуф Сипосномаи раиси КИ ҲХДТ дар вилояти Суғд тақдим карда шуд.

Рубрики
Асосӣ

Мулоқот бо намояндагони оилаҳои зарардидаи шаҳри Кӯлоб

15 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони оилаҳои зарардидаи шаҳри Кӯлоб мулоқот карданд.

Ҳадафи асосии сафар ба шаҳри Кӯлоб боздид аз ҷараёни корҳои барқарорсозии иншооту манзилҳои бар асари офатҳои табиии моҳи майи соли ҷорӣ зарардида ва шиносоӣ бо вазъи корҳои ободониву бунёдкорӣ ба муносибати 30 – солагии Истиқлоли давлатии Ҷумҳурии Тоҷикистон, мебошад.

Таъкид гардид, ки табиати имсола мардум ва кишвари моро бо офатҳои зиёд рӯ ба рӯ сохт, ки ҳамаи онҳо боиси хисороти зиёди молӣ ва мутаассифона, талафоти ҷонӣ низ гардиданд.

Сарвари давлат муҳтарам Эмомалӣ Раҳмон иброз доштанд, ки дар натиҷаи боришоти зиёд ва омадани сел рӯзи 11 майи соли ҷорӣ дар шаҳри Кӯлоб 3 нафар шаҳрвандон ба ҳалокат расида, 43 хона пурра ва 102 хона қисман, 606 иншооти ёрирасон, 4 мактаб ва муассисаҳои томактабӣ, 6 километр роҳ, 10 пул, қариб 25 километр хатҳои интиқоли барқ, 65 пояи оҳану бетонӣ, 7 трансформатор, 13,5 километр иншооти соҳилмустаҳкамкунӣ, 500 метр қубурҳои обгузар ва дигар иншооту таҷҳизоти инфрасохтори истеҳсоливу иҷтимоӣ ва коммуналӣ зарар диданд. Инчунин, дар хоҷагиҳои ҳудуди шаҳр ҳазорҳо сар чорво талаф ёфта, қариб 136 гектар майдони кишти зироатҳои кишоварзӣ, аз ҷумла пахта, ғалладона, сабзавот ва картошка хароб гардид. Маблағи умумии зарари офати табиӣ 46 миллион сомониро ташкил кард.

Президенти мамлакат муҳтарам Эмомалӣ Раҳмон таъкид намуданд, ки аз рӯзҳои аввали рух додани ин ҳодиса Ҳукумати мамлакат аҳолии зарардидаи шаҳри Кӯлобро бо ёриву ғамхорӣ фаро гирифта, доир ба рафъи оқибатҳои он андешидани чораҳои заруриро оғоз кард. Аз ҷумла, ба ҳамаи оилаҳои осебдида – 1725 хоҷагӣ ба таври фаврӣ кумакҳои моддӣ, аз қабили маводи хӯрокворӣ, ҷиҳози хона, сару либос, масолеҳи сохтмон ва сӯзишворӣ дастрас карда шуд.

Сохтмони 43 хонаи истиқоматии бар асари офати табиӣ пурра зарардидаи шаҳрвандон аз ҷониби мақомоти марказӣ ва маҳаллии ҳокимияти давлатӣ, инчунин, бо саҳми ташкилоту муассисаҳо оғоз гардид, ки то 20-уми августи соли ҷорӣ ба анҷом расонида шуда, бо ашёву лавозимоти зарурии рӯзгор таъмин гардида, ба аҳолии осебдида супорида мешавад. Имрӯз ҳашт хонаи навбунёд ба оилаҳои зарардида супорида шуд.

Президенти мамлакат муҳтарам Эмомалӣ Раҳмон вобаста ба вазъи имрӯза ба вазорату идораҳо, роҳбарони мақомоти иҷроияи ҳокимияти давлатии вилояти Хатлон ва шаҳри Кӯлоб супориш доданд, ки хонаҳои навро барои оилаҳои пурра зарардида дар муҳлати муқарраргардида ва бо сифати баланд ба истифода супорида, минбаъд корҳоро дар самти пешгирӣ кардани оқибати офатҳои табиӣ, аз ҷумла омода намудани инфрасохтори дахлдор, сари вақт огоҳ кардани аҳолӣ ва дигар чорабиниҳои заруриро ба таври васеъ ба роҳ монанд.

Таъкид гардид, ки Ҳукумати мамлакат бо дарназардошти саҳми бисёр арзишманди сокинони шаҳри Кӯлоб дар рушди кишвар, ҳифзи сулҳу оромӣ, суботи сиёсӣ ва махсусан, барқарорсозии ҳокимияти конститутсионӣ ба ҳалли мушкилоту масъалаҳои иҷтимоии онҳо ҳамеша эътибори аввалиндараҷа медиҳад.

Мавриди зикр аст, ки мардуми шарифи шаҳри Кӯлоб, дар баробари корҳои барқарорсозии иншооти бар асари офати табиӣ зарардида, дар қатори тамоми сокинони мамлакат ба хотири сазовор ҷашн гирифтани 30 – солагии Истиқлоли давлатӣ корҳои ободониву бунёдкориро вусъат бахшида истодаанд.

Ба ҳолати 1 июни соли ҷорӣ аз 873 иншооту биноҳои ба ифтихори ҷашни 30-солагии Истиқлоли давлатӣ пешбинигардида 800 иншоот сохта, ба истифода супорида шудааст, ки 92 фоизи нақшаро ташкил медиҳад.

Сарвари давлат бо итминон изҳор доштанд, ки дар муҳлати то ҷашн боқимонда роҳбарону масъулон, ташкилоту муассисаҳо, соҳибкорон ва ҳар як сокини шаҳр корҳои бунёдкориву ободониро вусъат бахшида, ҳамаи иншооти ба нақша гирифташударо бо сифати баланд ба истифода месупоранд.

Ҳукумати мамлакат ба масъалаи пешрафту ободии шаҳри Кӯлоб ва беҳтар намудани шароити зиндагии сокинони он ҳамеша эътибори хосса зоҳир карда, дар замони соҳибистиқлолӣ барои таъмин кардани рушди иҷтимоиву иқтисодии он аз ҳисоби ҳамаи сарчашмаҳо беш аз 3,5 миллиард сомонӣ равона намудааст. Бо мақсади рушди минбаъдаи соҳаҳои иқтисодиву иҷтимоии шаҳри Кӯлоб ва беҳтар гардонидни сатҳи зиндагии мардуми он Ҳукумати мамлакат Барномаи рушди иҷтимоиву иқтисодии шаҳри Кӯлобро барои солҳои 2020 – 2025 қабул намудааст, ки дар доираи он амалисозии 221 лоиҳа ба маблағи қариб 7 миллиард сомонӣ пешбинӣ ва татбиқ шуда истодааст.

Дар ин робита, роҳбарони мақомоти иҷроияи ҳокимияти давлатии шаҳри Кӯлоб вазифадор гардиданд, ки ҷиҳати сари вақт ва босифат амалӣ кардани барнома ва бартараф намудани мушкилиҳои ҷойдошта ҳамкориро бо вазорату идораҳо, соҳибкорон ва шахсони саховатпеша густариш бахшида, иҷрои ҳадафу вазифаҳои дар барнома пешбинишударо дар муҳлатҳои муайянгардида таъмин намоянд.

Роҳбарони шаҳр, хоҷагиҳои кишоварзӣ ва масъулони соҳа аз Президенти мамлакат супориш гирифтанд, ки якҷо бо Вазорати кишоварзӣ, Агентии беҳдошти замин ва обёрӣ ва Академияи илмҳои кишоварзӣ бо дарназардошти вазъи имрӯзаи ҷомеаи ҷаҳонӣ дар самти самаранок истифода бурдани ҳар як ваҷаб замин, хусусан, заминҳои президентӣ ва наздиҳавлигӣ ва гирифтани 2 – 3 ҳосил, баланд бардоштани ҳосилнокии зироатҳо ва маҳсулнокии чорво ва дар маҷмӯъ, зиёд намудани ҳаҷми истеҳсоли маҳсулоти кишоварзӣ ва захира намудану боз ҳам беҳтар таъмин кардани талаботи бозори истеъмолӣ тадбирҳои иловагӣ андешанд.

Сарвари давлат муҳтарам Эмомалӣ Раҳмон бо эътимоди комил иброз доштанд, ки дар ин раванд мардуми сарбаланд ва далеру ғаюри шаҳри бостонии Кӯлоб мисли ҳарвақта саҳми ватандӯстонаи худро мегузоранд.

Дар мулоқоти имрӯза оид ба рафти иҷрои корҳои бартарафсозии оқибатҳои офати табиӣ, бунёди манзилҳои истиқоматии сокинони аз офат зарардида, таъмини маводи озуқа ва масолеҳи сохтмонӣ раиси вилояти Хатлон Қурбон Ҳакимзода, раиси шаҳри Кӯлоб Абдуқодир Вализода, директори Агентии захираҳои моддии давлатӣ Нурмаҳмад Аҳмадзода ва раиси Кумитаи ҳолатҳои фавқулодда ва мудофиаи гражданӣ Рустам Назарзода ҳисобот доданд.

Супоришҳо ба роҳбарияти вилояти Хатлон ва шаҳри Кӯлоб оид ба бунёду таҷдиди роҳҳо, чароғонкунии хиёбонҳо, корҳои ободонию созандагӣ ва вусъати корҳои кишоварзӣ дода шуд.

Дар охири мулоқот баъди суханронии Президенти мамлакат як гуруҳ сокинони шукргузори шаҳри Кӯлоб баромад карда, ба Пешвои муаззами миллат муҳтарам Эмомалӣ Раҳмон барои ҳамаи таваҷҷуҳу ғамхориҳо ва талошҳову ташаббусҳои созанда баҳри беҳдошти шароити зисти мардум изҳори сипос намуданд. Онҳо Сарвари давлатро бовар кунонданд, ки минбаъд низ дар рушду пешрафт ва ободию шукуфоии сарзамини аҷдодӣ бо ҷонибдорӣ аз сиёсати созандаи Ҳукумати мамлакат, саъйю талош хоҳанд кард.

Манбаъ: http://www.president.tj/node/25956

Рубрики
Асосӣ

Гузоштани санги асоси мактаби таҳсилоти миёнаи умумӣ ва мактаб – интернати кӯдакони ятим ва бепарасторони ноҳияи Вахш

15 июн дар идомаи сафари корӣ дар ноҳияи Вахш Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти “20 – солагии Истиқлоли Тоҷикистон” ба бунёди ду мактаби нави таълимӣ – мактаби таҳсилоти ҳамагонӣ ва мактаб-интернати кӯдакони ятим ва бепарастори ба номи Мирзо Сатторов санги асос гузоштанд.

Зимни муаррифии лоиҳаи бинои нави таълимии ҳамагонӣ иттилоъ дода шуд, ки мактаб бо риояи талаботи замони муосир бунёд мегардад ва аз як ошёна, аз ҷумла утоқҳои фаннию лабораторӣ, китобхона ва дигар иншооти ёрирасон иборат буда, барои 480 нафар хонанда дар ду баст пешбинӣ гардидааст.

Таъкид кардан ба маврид аст, ки бо бунёди мактаби мазкур мушкилоти бошандагони атрофи деҳоти “20 – солагии Истиқлоли Тоҷикистон” ҳал гардида, дар рушди соҳаи маорифи ноҳия замина мегузорад.

Ба иттилои масъулон баъди ба истифода додани бинои нави таълимӣ, мушкилоти набудани мактаб ва ё дур будани он аз назди хонаҳои шаҳрвандон ба пуррагӣ ҳал гардида, ба ин васила сатҳу сифати таълиму тарбия низ хубтару беҳтар хоҳад гардид.

Дар муаррифии бинои мактаб-интернати кӯдакони ятим ва бепарасторон бошад, ба Сарвари давлат иттилоъ дода шуд, ки мактаб-интернат бо дарназартошти талаботи ҷаҳонӣ бунёд шуда, дорои як хобгоҳ барои 480 нафар, маркази саломатӣ бо 6 ҳуҷра, ошхона барои 480 кас ва меҳмонхона барои пайвандону наздикони хонандагон мебошад.

Президенти мамлакат муҳтарам Эмомалӣ Раҳмон ба сохтмончиёну масъулин дастур доданд, ки ҷараёни корҳои сохтмониро ҷиддӣ назорат карда, корҳои бунёдӣ бо сифат ва бо риояи талаботи меъморӣ бунёд гардад.

Иншооти мазкур аз ҷониби Ташкилоти ҷамъиятии байналмилалии хайриявии “Эҳёи Сомониён” бунёд гардида, то соли 2023 пурра сохта ба истифода дода хоҳад шуд. Иқдоми сохтмони мактаби таълимӣ ва мактаб – интернати бепарасторон дар деҳоти ноҳияи Вахш бо мақсади беҳтар намудани инфрасохтори соҳаи маориф ва фароҳам овардани шароити хуби таълим роҳандозӣ гардидааст. Ҳамин аст, ки дар ноҳия давоми се соли охир якчанд мактабу синфхонаҳои иловагӣ сохта ба истифода дода шуд, ки ба ин васила шароиту имконоти таълим низ беҳтару хубтар гардид.

Аз ин ташаббусҳои созандаи Пешвои миллат маорифчиёни ноҳияи Вахш рӯҳу илҳоми тоза гирифта, ваъда доданд, ки сиёсати маорифпарваронаи Сарвари давлатро сармашқи кори худ карда, дар тарбияи дурусти насли наврасу ҷавон саҳми муносиб мегузоранд.

Манбаъ: http://www.president.tj/node/25930

Рубрики
Асосӣ

Мулоқот бо сокинони зарардидаи деҳаи Иттифоқи деҳоти “20 – солагии Истиқлоли Тоҷикистон”-и ноҳияи Вахш

15 июн Пешвои миллат муҳтарам Эмомалӣ Раҳмон баъди боздид аз ҷараёни корҳои сохтмонии манзилҳои истиқоматии зарардидагон ва бартарафсозии оқибатҳои офати табиии рӯзи 11 май ба вуқӯъомада, дар деҳаи Иттифоқи деҳоти “20 – солагии Истиқлоли Тоҷикистон” бо сокинони зарардидаи деҳаҳои ноҳияи Вахш мулоқоти озоду самимӣ доир карданд.

Зимни суҳбат Сарвари давлат муҳтарам Эмомалӣ Раҳмон ба осебдидагони ин фоҷеаи табиӣ, таъкид намуданд, ки давлат ва Ҳукумати Ҷумҳурии Тоҷикистон ҷиҳати бартарафсозии оқибатҳои ин фалокат ҳамеша даст ба кор буда, пайваста аз ҳолу аҳволи оилаҳои зарардида огоҳ аст ва рафти корҳои ободонию созандагӣ ва барқароркунии хонаҳои истиқоматии сокинон зери назорати доимии Ҳукумати мамлакат қарор дорад.

Президенти мамлакат муҳтарам Эмомалӣ Раҳмон ба масъулини вазорату идораҳои дахлдор ва сохторҳои марбутаи ҷумҳуриявию вилоятӣ дастур доданд, ки барои ҳарчӣ зудтар барқарор намудани манзилҳои истиқоматӣ, роҳу пулҳо, ҷуйҳо, сарбандҳои рахнашуда ва дигар иншооти ифрасохторӣ тамоми қувва ва техникаю таҷҳизоти мавҷударо сафарбар намоянд ва дар муҳлати муқарраргардида, корҳои сохтмонии боқимондаро ба итмом расонанд.

Дар ҳамин ҷо Сарвари давлат ба як қатор сокинони деҳаи Иттифоқ, ки манзилҳои истиқоматиашон пурра омада гардидааст, калиди хонаҳоро тақдим намуданд.

Хонаҳои бунёдгардида, 3 ва 4 ҳуҷрагӣ буда, бо тамоми шароити буду боши зиндагӣ таъмин мебошанд.

Дар навбати худ сокинони зарардидаи деҳаҳои ноҳияи Вахш аз ғамхорӣ ва кӯмаку дастгириҳои хоссаи Пешвои миллат муҳтарам Эмомалӣ Раҳмон изҳори миннатдорӣ намуда, бо шукргузорӣ иброз доштанд, ки имрӯз дар чунин давлати орому соҳибихтиёр зиндагӣ мекунанд ва пайваста зери таваҷҷуҳи роҳбарияти олии сиёсии кишвар қарор доранд.

Бо дарназардошти ин бошандагони деҳоти “20-солагии Истиқлоли Тоҷикистон” дар назди Сарвари давлат ваъда доданд, ки аз як гиребон сар бароварда, дар ободӣ ва пойдории сулҳу суботи кишвар саҳми муносиби худро мегузоранд.

Таъкид бояд кард, ки рафти бартарафсозии оқибатҳои офатҳои табиӣ таҳти назорат ва роҳбарии бевоситаи Президенти мамлакат муҳтарам Эмомалӣ Раҳмон қарор дошта, дар ин самт комиссияи махсуси давлатӣ фаъолият мебарад.

Баъди мулоқоти самимӣ Сарвари давлат муҳтарам Эмомалӣ Раҳмон аз намоиши маҳсулоти кишоварзии ноҳияи Вахш дидан карда, бо фаъолият ва дастовардҳои имрӯзаи кишоварзони ноҳия шинос шуданд.

Зимни боздид аз ин гӯша ба Президенти мамлакат иттилоъ дода шуд, ки новобаста аз зиёни ба боровардаи офати табиии рӯзи 11 май, заҳамткашони ноҳияи Вахш бо масъулияти баланд ва иродаи қавӣ нисбат ба замину заминдорӣ камари ҳиммат баста, дар майдони 16 ҳазору 740 гектар, аз ҷумла 930 гектар сабзавот, аз ҷумла 286 гектар картошка, 1000 гектар полезӣ ва 950 гектар пахта кишт намуданд. Аллакай дар қисме ҳосили якум бардошта шуда, дар майдони 1800 гектар кишти такрорӣ, аз ҷумла 100 гектар кишти такрории пахта гузаронида шудааст, ки ҳоло нашъунамои хуб дорад.

Кишоварзони ноҳияи Вахш ҳамасола бо ба даст овардани ҳосили хуби маҳсулоти ватании кишоварзӣ дар таъмини бозори дохилӣ нақши арзанда доранд. Имсол хоҷагидорон аз гузашта дида, майдони кишти зироатҳоро васеъ намуда, меваю сабзавотро дар баробари таъмини бозори дохилӣ ба хориҷи кишвар низ содирот кардаанд.

Сарвари давлат муҳтарам Эмомалӣ Раҳмон аз натиҷаи ба даст овардаи заҳматкашони ноҳия ва дастгирии муроҷиати Президенти мамлакат доир ба истифодаи оқилонаи замин изҳори сипос намуда, ба хоҷагидорон ҷиҳати боз ҳам васеъ намудани майдони зироатҳо ва барқарор намудани боғу токзор аз ҳисоби боғоти кӯҳна дастуру ҳидоятҳо доданд.

Дар навбати худ аҳли заҳмати ноҳияи Вахш ваъда доданд, ки ҳидоятҳои Президенти кишварро сармашқи кори худ карда, бо кӯшишу талош ва меҳнати софдилона дар таъмини амнияти озуқавории кишвар саҳми муносиби худро мегузоранд.

Манбаъ: http://www.president.tj/node/25931

Рубрики
Асосӣ

Боздид аз ҷараёни корҳои барқарорсозии хонаҳои истиқоматии сокинони шаҳри Кӯлоб

15 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ҷараёни корҳои барқарорсозии хонаҳои истиқоматии шаҳрвандон, воқеъ дар маҳаллаи Даминзодаи шаҳри Кӯлоб боздид ба амал оварданд.

Мавриди зикр аст, ки дар натиҷаи боришоти зиёд ва омадани сел рӯзи 11 майи соли ҷорӣ дар шаҳри Кӯлоб 3 нафар шаҳрвандон ба ҳалокат расида, 43 хона пурра ва 102 хона қисман, 606 иншооти ёрирасон, 4 мактаб ва муассисаҳои томактабӣ, 6 километр роҳ, 10 пул, қариб 25 километр хатҳои интиқоли барқ, 65 пояи оҳану бетонӣ, 7 трансформатор, 13,5 километр иншооти соҳилмустаҳкамкунӣ, 500 метр қубурҳои обгузар ва дигар иншооту таҷҳизоти инфрасохтори истеҳсоливу иҷтимоӣ ва коммуналӣ зарар дид.

Тибқи дастуру ҳидоятҳои Сарвари давлат муҳтарам Эмомалӣ Раҳмон бунёди хонаҳои истиқоматии шаҳрвандон аз ҷониби ташкилоту муассисаҳои ҷумҳуриявӣ, вилоятӣ ва шаҳрӣ идома дошта, то ба имрӯз 7 хона сохта мавриди истифода қарор дода шудааст.

Дар ҳамин ҷо Пешвои миллат муҳтарам Эмомалӣ Раҳмон ба сардорони ду оилаи зарардида Назаров Исмоил ва Азизова Малика калиди хонаҳои истиқоматии навбунёдро, ки аз тарафи Вазорати корҳои дохилии Ҷумҳурии Тоҷикистон бо сатҳу сифати баланд ва тамоми шароити зарурӣ сохта шудааст, тӯҳфа намуданд.

Биноҳои истиқоматӣ дар майдони 104 метри муррабаъ ҷойгир буда, аз се ҳуҷраи истиқоматӣ: ошхона, ҳамом ва пешдолон иборат мебошад.

Сокинон аз кӯмакҳои пайваста ва ғамхориҳои Президенти мамлакат муҳтарам Эмомалӣ Раҳмон изҳори қаноатмандӣ намуданд.

Президенти мамлакат таъкид доштанд, ки оилаҳои зарардида дар кутоҳтарин муҳлат бо тамоми шароиту имкониятҳои зист таъмин мегарданд.

Корҳои бартарафсозии оқибати офати табиӣ ва корҳои сохтмонии дигар хонаҳои истиқоматии шаҳрвандони аз офати табиӣ харобгардида идома дорад.

Дар асоси дастуру супоришҳои Пешвои миллат муҳтарам Эмомалӣ Раҳмон то ба имрӯз ба 1725 хоҷагии зарардида кӯмаки яквақтаинаи маводҳои хӯрока, аз қабили орд, равған, шакар, биринҷ, пиёз, картошка ва дигар маводи рӯзғор расонида шуда, барои барқарорсозии хонаҳои зарардидаашон ҳамчунин дигар намуди масолеҳи сохтмонӣ ба монанди семент, арматура ва тахта дастрас карда шудаст.

Манбаъ: http://www.president.tj/node/25949

 

 

 

Рубрики
Асосӣ

Боздид аз роҳи мошингарди зарардидаи назди Муассисаи таҳсилоти миёнаи умумии №53 ва шиносоӣ бо корҳои бартарафсозии офати табиӣ дар канали Девонасой ва маҳаллаи Хатти Роҳи шаҳри Кӯлоб

15 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Кӯлоб аз мавзеъҳои бар асари сел зарардида боздид намуданд.

Сарвари давлат муҳтарам Эмомалӣ Раҳмон нахуст аз роҳи автомобилгарди зарардидаи назди Муассисаи таҳсилоти миёнаи умумии рақами 53 боздид ба амал оварда, бо корҳои бартарафсозии офати табиӣ дар канали Девонасой шинос шуданд.

Иттилоъ дода шуд, ки оби каналҳои Шӯраксой бо дарозии 6251 метр, Девонасой бо дарозии 6700 метр ва Тебалай бо дарозии 18 700 метр аз ҳудуди ноҳияҳои Шамсиддин Шоҳин, Мӯъминобод ва қисми болоии шаҳри Кӯлоб ҷорӣ гардида, ба пуррагӣ аз дохили маҳаллаҳои аҳолинишини шаҳр мегузарад. Оби каналҳои зикргардида ба дарёчаи Кӯлоб ворид шуда, дар ноҳияи Восеъ бо дарёи Ёхсу якҷоя мешавад. Манбаи асосии оби каналҳои зикршуда барф ва боронҳои мавсимии пуршиддати баҳорон мебошад.

Ёдовар мешавем, ки 11 майи соли равон бинобар боридани зиёди борону жола сел ба вуҷуд омад ва дар натиҷаи офати табиӣ дар кӯча, маҳалла ва деҳоти шаҳр, ҳамагӣ ба 145 хона, аз ин шумора 43 хона пурра, 102 хона қисман ва 606 иншооти ёрирасон хисороти ҷиддӣ расид. Инчунин, 10 адад пул, 4 адад муассисаи таълимӣ ва томактабӣ, 6 километр роҳҳои автомобилгарди кӯчаву маҳаллаҳо, хатҳои интиқоли барқ, 7 зеристгоҳи барқӣ, зиёда аз 13 километр хатҳои обёрии каналҳо, 5 агрегати барқӣ, 128 садяк замини кишти зироат, 128 сар ҳайвони калону майдаи шохдор зарар дид. Маблағи умумии хисороти расида 45,5 миллион сомониро ташкил медиҳад.

То ба имрӯз бо ҷалби техникаҳои зарурӣ дар маҳаллаҳои Хатти роҳ, Даминзода ва маҳаллаи Нонбойи Поён, ки аз офатҳои табиӣ бештар зарар дида буд, корҳои барқарорсозӣ, тоза кардани селобаҳо ва дар умум ба миқдори 5 ҳазор метри мукааб гилу селобаҳо бароварда шуд.

Дар маҳаллаи Фирдавсӣ як адад қубур бо дарозии 14 метр барқарор шуда, дар 182 километрии роҳи Душанбе – Кӯлоб корҳои сохтмонӣ идома дорад.

Айни ҳол дар маҳалли якҷояшавии каналҳои Девонасой ва Шураксой бо дарозии 1350 метр корҳои заминӣ, оҳану бетонӣ ва барқарорсозии иншооти пасткунандаи суръати об ҷараён дорад.

Дар ҳамин ҷо Президенти мамлакат муҳтарам Эмомалӣ Раҳмон оид ба рафти корҳои сохтмонӣ ба коргарон дастуру ҳидоятҳо доданд.

Манбаъ: http://www.president.tj/node/25948

 

 

 

Рубрики
Асосӣ

Оғози сафари корӣ дар шаҳри Кӯлоб ва зиёрати оромгоҳи Мир Сайид Алии Ҳамадонӣ

15 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар шаҳру ноҳияҳои вилояти Хатлон бо мақсади шиносоӣ бо корҳои бартарафсозии оқибатҳои офати табиӣ ва боздид аз ҷараёни барқарорсозии хонаҳои истиқоматии шаҳрвандон ба шаҳри Кӯлоб ташриф оварданд.

Сарвари давлат бо нишони эҳтирому қадршиносӣ ба гузаштагон нахуст оромгоҳи олим ва мутафаккири машриқзамин Мир Сайид Алии Ҳамадониро зиёрат намуда, бо қироати оятҳо аз Қуръони Маҷид баҳри суботу оромии Тоҷикистони соҳибистиқлол, осудагии мардуми кишвар ва пешрафту шукуфоии Ватан дуову фотеҳаи нек карданд.

Манбаъ: http://www.president.tj/node/25947

Рубрики
Асосӣ

Боздид аз ҷараёни сохтмони манзилҳои истиқоматии зарардидиагон дар ноҳияи Вахш

15 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар шаҳру ноҳияҳои вилояти Хатлон, ба ноҳияи Вахш ташриф оварданд.

Ҳадафи сафари Сарвари давлат ба ноҳияи Вахш шиносоӣ бо ҷараёни корҳои сохтмонӣ ва барқарорсозии оқибатҳои офати табиӣ дар минтақаҳои зарардидаи ноҳия мебошад.

Боздиди Президенти мамлакат муҳтарам Эмомалӣ Раҳмон аз мавзеъҳои осебдидаи деҳаи Иттифоқи деҳоти “20 – солагии Истиқлоли Тоҷикистон” оғоз шуд. Сарвари давлат аз рафти корҳои бартарафсозии оқибатҳои офати табиӣ ва ҷараёни корҳои сохтмонии хонаҳои истиқоматии оилаҳои зарардида шинос шуда, бо сокинон суҳбату мулоқоти озоду самимӣ анҷом доданд.

Ёдовар мешавем, ки субҳи 11 майи соли 2021 бар асари боридани боронҳои бошиддати пай дар пай ва омадани сел, ба хоҷагиҳои ноҳияи Вахш, аз ҷумла деҳоти “Машъал”, “20 – солагии Истиқлоли Тоҷикистон” ва “Ваҳдат” хисороти калони иқтисодӣ расида, дар натиҷа 41 манзили истиқоматӣ пурра, 33 хона қисман, 130 иншооти ёрирасони хоҷагиҳо, 8 адад пул, 10 километр роҳҳои автомобилгард ва майдони 1933 гектар зироатҳои кишоварзӣ хароб гардид. Мутаассифона ин ҳодиса боиси як талафоти ҷонӣ шуд. Маҷмӯан, зарари умумии расонидаи офати табиӣ 22 миллиону 711 ҳазор сомониро ташкил медиҳад.

Зимни мулоқоту суҳбат бо мардуми зарардида Сарвари давлат муҳтарам Эмомалӣ Раҳмон аз аҳолӣ даъват намуданд, ки ҳеҷ гоҳ рӯҳафтода набошанд ва онҳоро бовар кунонданд, ки то моҳи сентябри соли равон тамоми хонаҳои вайроншуда пурра барқарор карда мешаванд. Ҳамчунин вазорату идораҳо ва сохторҳои марбута, ки дар барқарорсозии манзилҳои истиқоматии шаҳрвандони осебдида ва бартараф намудани офати табиӣ масъул шудаанд, муваззаф гардиданд, ки ҷараёни корҳои сохтмониро зери назорати қатъӣ қарор дода, ҳар ҳафта ба Роҳбари давлат аз натиҷаи он ҳисобот пешниҳод намоянд.

Мавриди зикр аст, ки бо мақсади бартарафсозии оқибатҳои офати табиӣ ва азнавсозии хонаҳои истиқоматӣ, аз ҷониби Пешвои муаззами миллат муҳтарам Эмомалӣ Раҳмон пайваста ғамхориҳо зоҳир гардида, ҷараёни корҳои бунёдкориву ободонӣ зери таваҷҷуҳи бевоситаи Сарвари давлат қарор доранд.

Аз ин амалҳои башардӯстонаи роҳбарияти олии кишвар, мардуми зарардидаи деҳоти “20 – солагии Истиқлоли Тоҷикистон”, “Ваҳдат” ва “Машъал”-и ноҳияи Вахш изҳори хушнудӣ намуда, ҷиҳати дастгирӣ ва расонидани кӯмакҳои инсондӯстона ба Пешвои миллат изҳори сипосу миннатдорӣ баён намуданд.

Манбаъ: http://www.president.tj/node/25929