Андеша: Ватан! Чӣ калимаи гувороест, ки ҳангоми вирди забон овардани он беихтиёр тамоми ҷону руҳамонро қувва, нерӯ ва шодмонӣ фаро мегирад. Шукронаи онро мекунем, ки фарзанди чунин сарзамини биҳиштосо, дар иҳотаи инсонҳои хуб, ватандӯст, меҳанпараст, поквиҷдон ва поктинат ҳастем. Фарзанди ин давлат, ин миллат, ин сарзамин будан ин шарафу ифтихор аст. Ҳар шахси бовиҷдон баҳри ободию пешравӣ ва муҳофизати ватанаш бояд, ки то ҷон дар тан дорад, ҳисси худро гузорад. Чун ҳар яки мо дар ин дунё баҳри анҷоми вазифаи муҳиме омадаем ва баҳри адояш, бояд ҳамеша камари ҳиммат бубандем, зеро ғайр аз мо онро каси дигар ба сомон расонида наметавонад.
Хизмати Модар –Ватанро аз дилу ҷон мекунем,
Ҳар нафас шаъну шукӯҳашро фаровон мекунем .
Бас ки моро ӯ ба меҳри модарӣ парварадааст,
Дар вафодорӣ барояш аҳду паймон мекунем
Ватанро сидқан, қалбан бояд дӯст дошт, на танҳо бо забон, бо рафтору кирдор низ онро дар ҳар амали худ исбот намоем, зеро ҳар шахси ватандӯст ҳеҷ гоҳ инсони бад ба воя намерасад. Қалби ӯ лабрез аз муҳаббати Ватан – Модар аст, ки дигар баҳри бадбинӣ ҷойе надорад. Қалбамон бояд бо номи Ватан, бо ҳар як ҳарфи он ва бо ёди Ватан тапиш карда бошад.
Баҳри муҳофизаташ ҳамеша камари ҳиммат баста бошем, мисле ки сарбозони далеру шуҷоъи Ватан баҳри ҳимояаш шабу рӯз бедоранду ҳар як ваҷаби хоки онро посбонӣ мекунанд, мо низ саҳмгузор бошем, баҳри муҳофизаташ , нагузорем, ки ҷавононамон ҳатто дар фикрашон доир ба Ватани маҳбубамон зид баромада бошанд. Фарзандонамонро дар руҳияи ватандӯстиву ватанпарастӣ, хештаншиносиву худогоҳӣ тарбия намуда бошем, то ки дар оянда ҳангоми расидан ба синни даъвати ҳарбӣ худ бо як ҳисси баланди ватандӯстӣ дарки қарзи фарзандии хеш намуда, сарбаландона, содиқона ва софдилона адои хизмат дар сафи Қувваҳои Мусаллаҳи Ҷумҳуриии Тоҷикистон намуда, марзу буми аҷдодиро муҳофизат намуда бошанд.
З-ин сабаб аз фурсат истифода бурда, ба тамоми ҷавонони далеру шуҷоъ, даъват ба амал меорем, ки ба хизмати Ватан-Модар камари ҳиммат баста, нагузоранд, ки ягон пои нохалафон ба хоки Ватани азизи мо расаду ягон пораи хоки Ватани азизамон ноҷо гардад.
Инчунин, ба ҷавононе ки айни ҳол дар сафи Қувваҳои Мусаллаҳ сарбаландона адои хизмат мекунанд, аз самими қалб, гуфтаниям: Ҷавонони далеру шуҷоъ, ҳомиёни асили Ватан, қосидони сулҳу субот ва сутуни ин давлату миллат! Аз даргоҳи Худованд бароятон тани сиҳат, хонаи обод , зиракии сиёсӣ, мардонагиву ҷасорат, сабру тоқат ва матонатро хоҳонам. Пойдории сулҳу субот, осоиштагӣ ва тинҷию оромиии ин кишвар аз шумоён ҷавонони шуҷоъ вобаста аст.
Чи хеле ки Асосгузори сулҳу ваҳдати миллӣ – Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар яке аз баромадҳои худ баён кардаанд : “Мо бо хизмати софдилонаву ватандӯстонаи низомиёну афсарони кишвар, яъне фарзандони далеру ҷасур ва шуҷоъи Ватану миллат ифтихор мекунем”.
Аъзои фаъоли ҳизб дар ноҳияи Бобоҷон Ғафуров : Мамадҷонова М