Рубрики
Асосӣ

ПАНЧАКЕНТ: Тантанаҳои  идона ба муносибати  28-солагии Ҳизби Халқии Демократии Тоҷикистон дар ташкилотҳои ибтидоии ҳизбӣ идома дорад.

Панҷакент: Имрӯз дар бинои раёсати Омор бо иштироки аъзоён ва раиси ташкилоти ибтидои ҳизбӣ ба муносибати 28-солагии Ҳизби Халқии демократии Тоҷикистон таҳти унвони “Барои пешрафт ва зиндагии шоистаи мардум” мизи мудаввар баргузор гардид.

Дар ин чорабини мудири шӯъбаи кор бо занон Тоҷиева Мавлуда, мутахасиси бахши омори Кумитаи иҷроия Шамсиева Ҳилола иштирок ва суханронӣ намуданд.

         Қайд гардид, ки Ҳизби Халқии Демократии Тоҷикистон, ки меваи шаҳдбори даврони истиқлолият буда аз умқи мардум реша мегирад ва он ҳимояи манфиатҳои халқро ҳадафи асосии худ қарор дода барои саодати халқ ва ободии Ватан сайъу кӯшиш дорад.

Ҳизби Халқии Демократии Тоҷикистон бо сарварии Пешвои миллат мӯҳтарам Эмомалӣ Раҳмон ва сохторҳои маҳаллии он дар вилоятҳо, шаҳр ва ноҳияҳои ҷумҳурӣ тавонистанд бо тақвият бахшидани корҳои тарғиботӣ ва иттилоотӣ дар байни аҳолӣ ақидаҳои созандагию бунёдкориро дар амалӣ намудани нақшаву стратегияҳои Ҳукумати Ҷумҳурии Тоҷикистон якҷоя бо фаъолияти ҳизб ба иҷро расонанд.

         Дар охир Аъзоёни ҳизб низ оид ба нақш ва мақому манзалати Ҳизби Халқии Демократии Тоҷикистон ибрози андеша намуданд.

Рубрики
Асосӣ

ХУҶАНД: САҲМИ ЗАНОН ДАР ТАШАККУЛ ВА ПЕШРАФТИ ҲХДТ

Аз таъсисиёбии Ҳизби Халқии Демократии Тоҷикистон 28 сол пур шуд. 10 – декабри соли 1994 Ҳизби Халқии Демократии Тоҷикистон ташкил гардида, бо сарварии Эмомалӣ Раҳмон тӯли фаъолияташ ба боварии мардум сазовор шуда, ба бисёр дастовардҳо шарафёб гардидааст. Ҳизби Халқии Демократии Тоҷикистон ҳизби ормонҳои халқ буда, обрӯву нуфузи хосаеро ба даст овардааст.

Бо иқдоми Кумитаи иҷроияи ҲХДТ дар шаҳри Хуҷанд тибқи нақша – чорабинӣ дар доираи “Ҳафтаи ҳизб” ба муносибати 28-умин солгарди Рӯзи таъсисёбии Ҳизби Халқии Демократии Тоҷикистон дар ташкилоти ибтидоии “Фурӯзон” мизи мудаввар таҳти унвони “Саҳми занон дар ташаккул ва пешрафти Ҳизби Халқии Демократии Тоҷикистон” бо иштироки муовини раиси шаҳри Хуҷанд Фирӯза Нуруллозода, намояндаи Кумитаи иҷроияи ХХДТ дар вилояти Суѓд Азиза Мирзохӯҷаева фаъолзанон ва собиқадорони ҳизб баргузор гардид.

 Ҳамоишро муовини раиси кумиҷроияи шаҳри Хуҷанд Муҳаббат Ӯрунбоева ифтитоҳ намуда, номаи муборакбодии Раиси Кумитаи иҷроияи ҲХДТ дар шаҳри Хуҷандро ба муносибати Рӯзи таъсисёбии ҲХДТ ба саҳми ҳозирин расонид.

Сипас, ходими давлатӣ, шаҳрванди фахрии шаҳри Хуҷанд, собиқадори ҳизб Шуҷоат Ҳасанова ва аъзои фаъоли гуруҳи таблиғотии кумиҷроияи шаҳр, собиқадори ҳизб Хайринисо Темирова оиди ташкилёбии ҳизб, ғояҳои асосӣ, дастовардҳо ва ҳадафҳои Ҳизби Халқии Демократии Тоҷикистон  баромад карданд. Таъкид гардид, ки Ҳизби Халкии Демократии Тоҷикистон, ки зодаи даврони Истиқлолият аст, давоми мавҷудияташ ҳамеша барои муттаҳидию ҳамбастагии мардум кӯшиш ба харҷ медиҳад. Ҳизби Халқии Демократии Тоҷикистон дар раванди басо мушкилу мураккаби хомӯш кардани оташи ҷанги шаҳрвандӣ, вусъат бахшидани музокироти сулҳ ва таҳкими оромиву суботи ҷомеа нақши босазои худро гузошт. Ҳизби Халқии Демократии Тоҷикистон ба сифати нерӯи муқтадири сиёсии кишвар барои воқеан амалӣ гардидани озодиҳои сиёсию иқтисодӣ, интихоботи шаффофу демократӣ, волоияти қонун, иқтисодиёти гуногуншакл, рушди соҳибкории хурду миёна, ташаккули худ то имрӯз талош меварзад.         Ин ҳизби воқеан ҳам ормонӣ бо талош ва ҳидоятҳои созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Раиси муаззами ҲХДТ Эмомалӣ Раҳмон арзи ҳастӣ намуда, тавонист, чун ҳизби нуфузпайдокарда ва татбиқкунандаи идеяи миллӣ барои пешрафт ва шукуфоии кишвари азизамон хизмати шоиста кунад. Дар фарҷоми ҳамоиш ба якчанд нафар аъзоҳои навинтихобшуда дар вазъияти тантанавӣ шаҳодатномаи ҳизбӣ супорида шуд

Рубрики
Асосӣ

ПАНҶАКЕНТ:  Кумитаи иҷроияи ҲХДТ дар шаҳри Панҷакент дар ҳамкорӣ бо мактаби варзишии наврасону ҷавонони шаҳр  дар толори варзишии  “Иброњими ба ифтихори 28-солагии таъсисёбии Ҳизби Халқии Демократии Тоҷикистон байни хонандагони синфҳои болоӣ ва аъзоёни ТҶҶ  “Созандагони Ватан” оид ба тенниси рӯи миз мусобиқа баргузор намуд.     

     Ҳизби Халқии Демократии Тоҷикистон бештар ба ҷавонон ва насли наврас такя менамояд. Зеро шуури онҳо аз таъсири ҳар гуна афкори яктарафаи идеологӣ ва ташаббус озод аст.

Ташкили чунин мусобиқаҳо имконият медиҳанд, ки ҷавонон ба варзиш таваҷҷуҳи бештар зоҳир намоянд. Баъди ин мусобиқа хоҳишмандони машқу тамрин дар  машғулиятҳои мактаби варзишӣ бештар мешавад.

Рубрики
Асосӣ Мақола

КОНИБОДОМ: ХУШУНАТ ДАР ОИЛА – ШАҲОДАТИ НОСОЛИМИИ ОН (Андеша)

Оила аз ишқ мегирад бақо,
Оила аз сидқ меёбад сафо.

Зиндагӣ силсилаест,ки қофилаи таърихро сӯи абадият ҳидоят намуда,ҳар лаҳзаеро барои ҳастӣ гуворотар месозад. Дар ин сарбаландӣ нақши оила хеле барҷаста буда,оилаи хуб ин бунёдгари ҷомеаи мутараққӣ маҳсуб меёбад.
Қонуни Ҷумҳурии Тоҷикистон «Дар бораи пешгирии зӯроварӣ дар оила» аз соли 2013 инҷониб мавриди амал қарор дорад. Ҳадаф ва мақсади қонуни мазкур  танзими муносибатҳои ҷамъиятӣ оид ба пешгирии зӯроварӣ дар оила, ошкор ва бартарафсозии ҳолатҳои хушунатбори оила мебошад. Пешгирӣ нисбати хушунату зӯроварӣ дар оила яке аз масъалаҳои муҳим дар ҳаёти ҷомеа ба ҳисоб рафта, ҳамеша зери таваҷҷуҳи махсуси давлату Ҳукумат қарор дорад.
Бояд гуфт, ки амалҳои зӯроварӣ ва хушунат дар оила имрӯзҳо ба шаклҳои мухталиф зоҳир мегардад. Аз ҷумла бештари ҳолатҳои хушунатбори оилавӣ ин таҳдиду зӯроварии мардон нисбати ҳамсарони худ, хушунати падару бародар нисбати духтарон хоҳарони худ ва дар бисёр маврид хушунат ва бадбинии хушдоман нисбати келинҳои худ мебошад, ки боиси вайроншавии оилаҳо мегардад. Инчунин дигар сабаби вайроншавии оилаҳо дар ҷомеаи имрӯзаи мо ин омода набудани ҷавонон ба оиладорӣ ва ҳаёти мустақилона, паст будани маърифати ҳуқуқӣ, огоҳ набудан аз ҳуқуқҳои маънавии хеш, паст будани одобу муошират ва босабру таҳаммулпазир набудан дар зиндагӣ мебошад.
Мутаассифона, имрӯз дар баъзе хонадон хушунат ва зӯроварӣ нисбати зану фарзанд ва аъзои заифи оила ба “як қоидаи маъмулӣ” табдил ёфтааст, ки бо истифода аз ҷисми қавӣ мардон зӯриву дағалиро нисбати зану фарзанди худ раво мебинанд ва ҳатто дар назди пайвандон ба якдигар суханҳои қабеҳона мегуянд, ки ин куллан норавост ва ин оила аз ҷиҳати маънавӣ оилаи солим набуда, дар оянда низ таъсири бади худро болои фарзанд хоҳад гузошт. Баръакс ин мард вазифадор аст, ки иззату эҳтиромро дар оила ҷорӣ намояд, ба фарзандон шароитҳои лозимаро муҳайё намуда , оилаи солим бунёд созад.
Хушунату зӯроварӣ дар оила фазои солими хонаводаро вайрон карда, боиси ба миён омадани нобоварӣ, бедоршавии ҳисси нафрат ва аз байн рафтани муҳаббату самимият мегардад. Ҳол он, ки оилаи солим дар заминаи муҳаббату эҳтироми дуҷонибаи аҳли хонавода бунёд меёбад.
Бигзор иттифоқу ҳамдилӣ , меҳру муҳаббати самимӣ ва фазои комили хушбахтӣ дар байни ҳар оилаи тоҷик барқарору устувор бошад.
Зеро:
Оила пайванди инсон бо Ватан,
Оила пайванди имон бо Худо.

Фируза Шерматова
Муовини раиси кумитаи иҷроияи ҲХДТ дар шаҳри Конибодом

Рубрики
Асосӣ

ИСТАРАВШАН:  Имрӯз, дар асоси нақша-чорабинии КИ ҲХДТ дар шаҳри Истаравшан ҷиҳати истиқболи сазовори 28-солагии таъсисёбии Ҳизби Халқии Демократии Тоҷикистон байни омӯзгорон ва донишҷӯёни Коллеҷи ҷумҳуриявии ҳунарҳои мардумии шаҳри Истаравшан дар мавзӯи “ҲХДТ-ҳизби ормонҳои миллӣ” мулоқот баргузор гардид, ки дар он намояндагони КИ ҲХДТ дар шаҳри Истаравшан иштирок намуданд.

Дар мулоқот масъулин ба сухан баромада зикр намуданд, ки ҲХДТ аз ҷавонтарин ҳизбҳои сиёсии кишварамон буда, метавон онро зодаи даврони истиқлол номид. Ҳамчунин, ба донишҷӯён оид ба Оиннома ва Барномаи ҳизб маълумот дода шуд.   

Рубрики
Асосӣ Мақола

ГУЛИСТОН: ҲХДТ – ҲИЗБИ ОРМОНҲОИ ХАЛҚ

Дар тӯли 28-соли фаъолияти худ, Ҳизби Халқии Демократии Тоҷикистон ба як ниҳоди сиёсии пурнуфуз табдил ёфта, тамоми нерӯҳои солими ҷомеаро дар сафҳои худ муттаҳид намудааст ва бо мақсади зина ба зина баланд бардоштани некӯаҳволии халқ, рушди иқтисод ва таъмини ҳуқуқу озодиҳои инсон таъсис ёфта, барои дар амал татбиқ намудани ин ҳадафҳо фаъолият намуда истодааст.

       Дар Барномаи Ҳизби Халқии Демократии Тоҷикистон зикр гардидаст, ки мафкураи сиёсию иҷтимоии ин ҳизби сиёсиро мардум эътироф менамоянд ва ин ташкилоти ҷамъиятию сиёсӣ тавонист дар Ҷумҳурии Тоҷикистон дар бобати ором намудани вазъи сиёсии кишвар, ба ватан баргардонидани гурезагон, бартараф намудани оқибатҳои ҷанги шаҳрвандӣ, муттаҳҳид намудани миллат, таҳкими сулҳу ваҳдат ва ҳифзи арзишҳои миллӣ, такмили сохтори давлатдорӣ, тарғиб ва такмили дастовардҳои даврони истиқлолият, рушди босуботи кишвар, таъмини зиндагии шоиста саҳми назаррас гузорад.

       Саҳми ҳизбиён дар роҳи таҳкими дастовардҳои солҳои соҳибистиқлолӣ пеш аз ҳама ватандӯстӣ, ҳимояи шаъну шарафи давлат, фаъолнокӣ дар корҳои ҷамъиятӣ, тарбияи дурусти фарзандон, асолатмандӣ, дурӣ аз тақлиду бегонапарастӣ, анҷом додани амалҳои бунёдкорона ва амсоли инҳо мебошад.

         Ҳизби Халқии Демократии Тоҷикистон бо роҳбарии муҳтарам Эмомалӣ Раҳмон ва сохторҳои маҳаллии он дар вилоятҳо, шаҳр ва ноҳияҳои ҷумҳурӣ тавонистанд бо тақвият бахшидани корҳои тарғиботӣ ва иттилоотӣ дар байни аҳолӣ ақидаҳои созандагию бунёдкориро дар амали намудани нақшаву стратегияҳои Ҳукумати Ҷумҳурии Тоҷикистон якҷоя бо фаъолони ҳизб ба иҷро расонанд. Аз ҳамин ҷост, ки сиёсати ҳизбии моро табақаҳои гуногуни ҷомеа дастгирӣ менамоянд.  

Рубрики
Асосӣ

АШТ: Идомаи баргузории хониши сиёсӣ таҳти унвони “Истиқлолият, президент ва ҷавонон” дар муассисаи таҳсилоти миёнаи умумии рақами 37 ҷамоати деҳоти Шодоба

Рубрики
Асосӣ

АЙНӢ: ҲХДТ-28 сол бо халқу миллат

Тибқи нақша оид ба “Ҳафтаи ҳизб” дар ташкилоти ибтидоии “Хушекат”-и назди КИ ҲХДТ дар ноҳия бо иштироки масъулини кумиҷроия, чорабиниҳои варзишӣ, суҳбату мулоқоти судманд ва роҳпаймоӣ таҳти унвони “ҲХДТ-28 сол бо халқу миллат”  доир карда шуд.

Дар ибтидо, масъулин табрикоти раиси кумиҷроияи ноҳияро бахштида ба 28-солагии таъсисёбии ҲХДТ расонида, дар иҷрои ҳадафҳои созандаи ҳизб муваффақиятҳои беназирро таманно намуданд. Сипас, аъзоёни фаъоли ҳизб, созандагон зери шиорҳои “Барои зиндагии шоистаи мардум”, “Ҳамрозу ҳамдами халқ”, “Барои рушди устувори иқтисодӣ” роҳпаймоӣ  намуданд.

Иқдомҳои “Ҳафтаи ҳизб”-и дар дигар ташкилотҳои ибтидоии назди кумиҷроияи ноҳия бомаром идома дорад.

Рубрики
Асосӣ Мақола

ХУҶАНД: ҲХДТ ОИНАИ РӮНАМОИ ҶОМЕА

Асосгузори сулҳу ваҳдати миллӣ – Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар яке аз суханронии хеш баён доштанд: «Робитаи қавӣ доштан бо халқ ва ифодакунандаи ормонҳои бисёрсолаи он будан ҷавҳари асосии фаъолияти Ҳизби Халқии Демократии Тоҷикистонро ташкил дода, садоқат ба он ва дар ин роҳ соҳибиродаву бомасъулият будан асоси муваффақиятҳо ва эътимоди мардум ба он мебошад. Ба ибораи дигар, ҳизби мо мардумӣ ва зодаи даврони истиқлол буда, дар асоси ормонҳои халки шарифи кишварамон таъсис ёфтааст».

Воқеан, ҳам омили зуд маҳбубият пайдо намудани Ҳизби Халқии Демократии Тоҷикистон дар ҷомеа маҳз бо мардум сарукор гирифтану аз розу ниёзи онҳо огоҳ будан аст. Ин ниҳоди созанда ҷомеаи моро ба маҷрои дуруст ҳидоят намуда, ба сулҳу созиши миллӣ, ваҳдат расонд, таҳти роҳбарии он ҷомеа ба марҳилаи созандагиву бунёдкорӣ ворид шуд.

Ҳизби Халқии Демократии Тоҷикистон замоне арзи вуҷуд кард, ки дар кишварамон нобасомониҳо идома дошту мардум аз ҳизбсозию ҳизббозӣ дилозурда шуда буданд. Зеро баъди ба даст овардани соҳибистиқлолии кишвар як гурӯҳ аз мансабхоҳони миллаткуш мехостанд давлатамонро зери даст гирифта, онро чун як бозичаи саридастӣ идора кунанд.

Заминаҳои дигари таъсисёбии Ҳизби Халқии Демокартии Тоҷикистон ин пеш аз ҳама талаботи замон, қонеъ нагардонидани дархости мардум аз ҷониби ҳизбҳои дигар ва мушаххасу мақсаднок набудани ҳадафҳои барномавии онҳою ҳамрайъ набудани ашхосе, ки таъсисдиҳандаи ҳизб ҳастанд, бо мардум аст.

Агар аз дидгоҳи имрӯз ба равандҳои он замон нигарем, равшан мебинем, ки дар он рӯзҳои вазнин тарғиб намудани ғояҳои ҳизби нави сиёсӣ кори осон набуд. Мардум баъди ҳодисаҳои фоҷиабори ибтидои солҳои 90-ум, вақте ки баъзе ҳизбҳои сиёсӣ ва ҳаракатҳои мардумӣ зери ниқоби муборизаи сиёсӣ даст ба экстремизм заданд ва қариб буд, ки миллатро ба вартаи ҳалокат ва мамлакатро ба порашавӣ оварда расониданд, дигар ба ҳизбҳои тозабунёд бовар надоштанд.

Тавре аз суҳбати собиқадорони ҳизб маълум гардид,  дар солҳои 1993 то 1997 на танҳо мардуми оддӣ, балки бархе аз роҳбарони мақомотҳои мухталифи болоӣ аз ба Ҳизби Халқии Демократии Тоҷикистон шомил шудан метарсиданд. Ин гуна роҳбарони мавқеи сиёсии муайян надошта, дудила, бетараф, интизоршаванда кам набуданд.

Хеле бомаврид аст, дар ин асно андешаронии Пешвои миллатро қайд намоем; «Дар ин давра ҳанӯз наметавонистем ҳизбро пурқувват гӯем, зеро заминаи иҷтимоии он ҳанӯз қавӣ набуд. Ин ҳолат то соли 1997 давом кард. Ман ба хулосае омадам, ки аз чунин ҳизбҳои камтаъсир барои сиёсати давлат он қадар фоидае нест, бинобар ин, дар вазифаҳои пурмасъулият бояд кадрҳои соҳибобрӯ ва бомаҳоратро пешбарӣ мекардем».

Ана дар ҳамин авзо ҳизби мо чун раҳнамо вориди сиёсат шуда, аз нахустин рӯзҳои фаъолияташ мавқеи устувори сиёсиро дар ҷодаи ҳимояи манфиатҳои халқ ба даст гирифт. Он дар такя ба ҳадафҳои стратегии давлат ва Ҳукумати кишвар бо пиёда намудани Барномаҳои мукаммали худ дар ҳама соҳаҳо муваффақ гардид. 

Идеяи таъсисёбии ҳизб бо пешниҳоди Асосгузори сулҳу ваҳдати миллӣ – Пешвои миллат, Раиси муаззами ҲХДТ муҳтарам Эмомалӣ Раҳмон соли 1994 аз ҷониби ходимони сиёсӣ ва роҳбарони фаъол ба амал омад ва ин ҳизб бо номи Ҳизби Халқии Тоҷикистон ба арсаи сиёсии кишвар ворид шуд. Ва аввалин ташкилотҳои худро дар маркази шаҳри Душанбе ва дигар минтақаҳо таъсис дод. Дар ин миён таъсиси нашрияи «Минбари халқ» бешубҳа барои ташвиқу тарғиби ғояҳои ҳизб нақши густурда бозид. Омили асосии дар як муддати кӯтоҳ дар ҷомеа нуфуз пайдо кардан ва ба пешрафт ноил гаштани ҳизби мо дар он аст, ки он манфиатҳои ҳамаи қишрҳои ҷомеаро ҳимоя мекунад ва барои бароварда сохтани ормонҳои онҳо талош меварзад. Таъсиру нуфузи ҳизб дар байни мардум дар он ба зуҳур меояд, ки онҳо хостаҳои худро ба вакилонашон дар зинаҳои гуногуни мақомоти интихобӣ дилпурона пешниҳод мекунанд. Вакилони ҳизби мо дар маҷлисҳои намояндагон ва маҳаллӣ ҷиҳати таҳия ва қабули қонунҳо ва санадҳои дигари ҳуқуқӣ нақши арзандаи худро мегузоранд. Силсилаи қонунҳо, ки ба танзими ҳаёти иқтисодию иҷтимоии мардум нигаронда шудаанд, дар барномаи пешазинтихоботии ҳизб инъикоси худро ёфтаанд.

Кумитаи иҷроияи Ҳизби Халқии Демократии Тоҷикистон дар шаҳри Хуҷанд ҳарчанд 24 июни соли 1998 бо Қарори Конфронси муассисон ташкил шуда бошад ҳам, идеяи таъсиси он ҳанӯз аз солҳои 1994-1995 дар назди равшанфикрону пешқадамон меистод.

 Агар дар солҳои аввали ташкилёбии ҳизб шумораи аъзоён 300 нафар дар 9 адад ташкилотҳои ибтидоӣ сарҷамъ шуда бошанд. Пас имрӯз ин рақам ба  зиёда аз 20 ҳазор мерасанд, ки онҳо дар 251 ташкилотҳои ибтидоӣ ва 5 кумитаи иҷроияи ибтидоии ҲХДТ сарҷамъ омадаанд, ки ин яке аз баландтарин нишондод дар миқёси вилоят мебошад. Мо аз он ифтихор дорем, ки имрӯз дар сафи ҳизбамон 57 докторони илм, 278 номзадҳои илм, шумораи зиёди коркунони соҳаҳои маорифу тандурустӣ фаъолияти босамар доранд.

Ташкилотҳои ибтидоии ҳизбӣ пояи асосии кумиҷроияи маҳаллии ҳизбӣ маҳсуб шуда, фаъолияти назарраси ҳизбиён ба фаъолияти ин зинаи ҳизб сахт алоқаманд аст.

Имрӯз кумитаҳои иҷроияи ибтидоӣ ва ташкилотҳои ибтидоии ҳизб чун қаноти пурқуввати кумиҷроияи ҳизб дар пешбурди талаботҳои Оинномавиву Барномаи ҳизб ва корҳои тарғиботию сиёсӣ фаъолона саҳм мегиранд. Фаъолияти онҳо мунтазам дар ҷаласаҳои корӣ баррасӣ шуда, мавриди омӯзиш қарор мегирад. Дар ин росто аз ҳисоби аъзоёни Раёсат ва кормандони дастгоҳи кумиҷроияи шаҳрӣ сарпараст таъин шудан ба кумитаву ташкилотҳои ҳизбӣ масъулияти ташкилотҳоро дар раванди қабули аъзо, танзими ҳуҷҷатгузорӣ, мунтазам баргузории ҷаласаҳо, хонишҳои сиёсӣ хеле боло бурд.

Ба қатори ташкилотҳои ибтидоии беҳтарин бошад, Беморхонаи бачагона, Маркази стандартизатсия ва метрологияи вилоят, Идораи шабакаҳои барқи шаҳри Хуҷанд, Омори вилоят, Беморхонаи физиотерапевтӣ, Беморхонаи вилоятӣ,  Таваллудхонаи вилоятӣ, Беморхонаи шаҳрии №1, Маркази дилшиносии вилоят, Маркази саратоншиносӣ,  Стансияи эпидимологӣ – санитарии вилояти Суғд,  Таваллудхонаи шаҳрӣ, Амонатбонк, Бонки миллӣ, Маркази саломатии шаҳрии №5, Ориён, Сино, китобхонаи оммавии Т.Асирӣ, Ҷавонӣ, Хонаи кӯдакон,  Кумитаи маҳаллаи 1 Май, Тути Калон ва дигаронро номбар кардан мумкин аст. Бо истифода аз фурсати муносиб барои фаъолияти намунавиашон ба роҳбарияти ташкилотҳои зикршуда арзи сипос менамоям.

Имрӯз ҷомеаи кишвар ба қудрат ва тавоноии бонувону ҷавонон дар доман задан ба таҳаввулоти иҷтимоӣ, маъракаҳои сиёсӣ ва умури давлатдорӣ сахт эътимод дорад. ҲХДТ аз он нуктаи назар, ки ин қишрҳои фаъоли ҷомеа дорои қудрату потенсиали зиёд ҳастанд, муносибат карда, роҳҳои нави дарёфти истеъдодҳои ҷавонро меҷӯянд. Таъсиси  созмони ҷамъиятии ҷавонон «Созандагони Ватан» аз он дарак медиҳад. Иттиҳодияи мазкур воқеан ҳам фазои холигиро пур кард ва сафи ихтиёрони он низ рӯз аз рӯз аз ҳисоби ҷавонон зиёд мегардад.

Дар назди шуъбаи занони кумиҷроия фаъолият бурдани маҳфили доимоамалкунандаи “Муросо” ва “Рози бону” барои таҳкими оиладорӣ, ширкати занону бонувон дар чорабиниҳои мухталиф бар манфиати кор аст.

Таъсиси курси захираи кадрҳо дар назди кумиҷроияи шаҳрӣ ва ба он ҷалб шудани ҷавонону бонувони фаъол барои боз ҳам хубтар муаррифӣ шудани ҳизб дар ҷомеа таккони бузурге бахшид.

Рисолати аслии ҳизбиён ташвиқу тарғиби дастовардҳои навини мамлакат буда, то ба мардум расонидани  ҳадафҳои созандаи давлату Ҳукумат, ҳамчунин омӯзиши ҷанбаҳои пешрафти тамоми соҳаҳои хоҷагии халқро тараннум кардан ва дар ҳамбастагӣ бо сохторҳои далхдор ҳал намудани мушкиливу муаммоҳо мебошад.

Маврид ба зикр аст, ки Кумитаи иҷроияи ҲХДТ дар шаҳри Хуҷанд дар кишвар яке аз аввалинҳоест, ки соҳиби сомона бо домени hhdt-khujand.tj  ва нашрияи ҳизбии худро дорад, ки 8 сол ин ҷониб мунтасил фаъолият дорад. Дар саҳифаҳои сомона ва нашрия хабару гузориш, мақолаҳо аз рӯзгори фаъолон, таҳлили вазъи сиёсӣ, вокунишҳои саривақтӣ ба маводҳои ғаразноки душманони миллат нашр мешаванд.

Вазъи ҳозираи сиёсии кишвар аз ҳарвақта дида бештар тақозо менамояд, ки ҳар як аъзои ҳизб садоқати худро ба ғояҳои волои он нишон дода, нерӯи ҷисмониву зеҳнии худро ба ҳифзи дастовардҳои соҳибистиқлолӣ, таҳкими пояҳои давлатдорӣ, ваҳдати миллӣ, сулҳу суббот ва рушди минбаъдаи иқтисодиву иҷтимоии мамлакат равона созад.

Баробари ин масъулияти таърихие, ки ҳизб дар назди ҷомеа дорад, ҳар як аъзои Ҳизби Халқии Демократии Тоҷикистонро вазифадор менамояд, ки аз рӯйдодҳои муҳими сиёсии кишвар ва хориҷи он воқиф бошад ва ба он баҳои сиёсӣ дода тавонад.

Бахтиёр ИСМАТҶОНОВ, раиси КИ ҲХДТ дар шаҳри Хуҷанд